Red Cross Council naghiwat leadership camp

by Mary Therese Encina

Guintambungan sang 92 ka estudyante halin secondary kag tertiary levels ang nahauna nga camp nga guinhiwat sang CPC Red Cross Youth Council (RCY) sining Setyembre 20-22 sa Arnaldo Blvd. Campus. Ini nga aktibidades nga may tema nga: “Leadership is about taking responsibility, not making excuses” nagatuyo nga tib-ungon kag pabaskugon ang kapasidad sang mga kabataan sa pamuno kag pag-responde sa mga emergency cases.

Suno sa RCY adviser nga si Alna Paulyn Capapas, naglapaw kuno ang kadamuon sang mga nag-ililintra sa quota nila nga 30. Ini nga numero guintatap sang mga facilitators nga naghalin man sa mismo nga kolehiyo, naisip nga Red Cross Youth Council members sang Filamer Christian University (FCU) kag ang mga Red Cross volunteers nga sina Cyprian Basa kag Zyque Basa.

Naghatag sang pagpamulong sina Dimples Opina kag Peter Paul Arcenas sang Emergency Response Unit (ERU) suno sa Basic First Aid. Si Ayr Altabas naman, ang Committee Chairman sang Voluntary Service, ang nagpulong mahitungod sa Youth Volunteer Orientation Course (YVOC). Kaupod kay Mr. Altabas si Fercel De Guzman, Chapter Youth Council President sa pagpakilala kag pagtudlo sang mga dapat hibaluon nahanungod sa Red Cross. Kapin naman sa self-awareness ang mga guinpang-tudlo sang Chapter Service Representative sang Red Cross Volunteer Service, nga si Diana B. Flores. Katingob man sang CPC team sina Ricardo Batilaran Jr. R.N., ang Leadership Development Program Instructor kag si Joel Almorin R.N., ang Leadership Development Program Instructor and In-Charge sa mga guin-hiwat nga team-building activities.

Nasukat man ang pisikal nga kakusog kag kabakod sang mga campers sa ila nga mga interactive obstacle races sang sila guin-tunga-tunga sa pito ka grupo nga guinpangalan gikan sa 7 Fundamentals of Red Cross nga: Humanity, Impartiality, Neutrality, Independence, Volunteerism, Unity kag Universality.

Ini nga buluhaton nga guin-buylog sang CPC RCY guina-hangop pa nga mapadayon sa sunod nga mga tinuig.

Author: Ivy Lopez

Share This Post On

Leave a Reply